أهم شي لازم تسويه بالكلية؟

الوقت يمرّ بسرعة، ومنلاحظ هالشي، إلّا بعد فترة، من نباوع للأيام اللي مضت، وندرك ان الوقت يمشي بسرعة.

وقت الكليّة بالضبط هيج، تفتح تغمض، من المرحلة الأولى ودتتعوّد ع الأجواء والدوام، الى أن تجد نفسك متخرج تفكر شنو خطوتك الجاية؛ زواج، عمل، مشروع، لو شي ثاني؟
وقت الكليّة وقت حلو، فبصورة عامة، هو الوقت اللي بيه حريّة ما لكيتها بالمدرسة، وبيه وقت فراغ مراح تلكاه مستقبلاً (بسبب العمل والمسؤوليات).
لذلك أكو شغلات عندك فرصة تطورها بالكلية، لأن لاحقًا مراح تلكه الوقت، أو راح تكون متأخر عليها.

هذا الوقت راح يكون وقت مثالي تبدأ تستثمر بنفسك ..

شنو الأشياء اللي مهم تنتبه إلها خلال هذه الفترة؟

طوّر أنكليزيتك

الإنكليزية هي لغة العصر، ماكو مكان حاليًا ما بيه أنكليزي، وأفضل شيء تسويه حتى تواكب الأشياء الجديدة، هو تتعلم أنكليزي.

راح تتعجّب بكمية المصادر / الفيديوات / المقالات الانجليزية الموجودة على الأنترنت، بس أتخيل أن اللغة العربية ماخذة 1.1% من المحتوى على الانترنت، مقارنة بالانكليزية 60%

الانكليزية هي باب واسع لاي شي تريد تعرفه، لأن كل العالم يتكلم بيها ..

أيضًا، معظم الشركات العراقية تشتغل باللغة الانجليزية، وما أتذكر شفت وظيفة إدارية إذا ما مطلوب بيها لغة.

تعلُم الإنكليزية يستاهل تستثمر بيه، وعندك وقت خلال الكلية، تبدي من الصفر وتوصل لمستوى عالي بيها.

مو شرط تروح معهد يعلمك أنكليزي، اليوتيوب بيه عشرات الدروس اللي تعلمك، وموجودة عشرات التطبيقات للموبايل اللي تفيدك ..

تحتاج فقط الرغبة بالتعلم، والالتزام ..

تكدر تستفاد من ديولينجو، تطبيق سهل ورائع يكدر يعلمك، وبسهولة:

https://www.duolingo.com/

أتعلم للحاسبة

صحيح أنت تعرف للموبايل، وتعرف تتعامل مع نظامه، وتعرف تشتغل بيه ..

لكن الموبايل مجرد اداة صغيرة أمام الكومبيوتر الشامل ..
مستحيل الموبايل يكون بديل للحاسبة ..

وخلّي أبالّك شغلة ..

عدا الشغلات الخدمية (التنظيف، الطبخ ..) ماكو وظيفة بدون حاسبة ..

عدا الشغلات الخدمية (التنظيف، الطبخ ..) ماكو وظيفة بدون حاسبة ..

الحاسبة مو بس للشغل، وحتى تحصل وظيفة، بالعكس، الحاسبة تفيدك بتسهيل هواي مهام بحياتك ..

زين، شتتعلم بالحاسبة؟

أول شيء أتعلم للبرامج المكتبية، وهي الأساس .. وورد وأكسيل ..

ممتخيل شكد ممكن يفيدنك، خصوصًا الأكسيل ..
تكدر من خلاله تختصر، تتبع، وتدير معلومات هواي .. وحسب الطريقة اللي تريد تستفيد منه بيها.

الحاسبة راح تكون داعمة لك حتى تتعلم الإنجليزية أكثر. فمثلما علمّك الموبايل كلمات انكليزية، نفس الشي بالحاسبة ..

ابني عادات

شخصيتك متكونه من مجموع عاداتك ..
لذلك، مصيرك تتحكم بيه عاداتك .. وحتى تغيّر نفسك، لازم تغيّر عاداتك ..

العادات هي الأشياء اللي تسويها بإستمرار، شي متعوّد عليه ..

مثلاً رياضة، كتابة، قراءة، لعب، يوتيوب ..
كل واحد عنده عاداته ..

العادات المهمة؟

أهم عادة لازم تبنيها هي عادة تنظيم الوقت

تنظيم الوقت معناه ان تخلي لنفسك أولويات وتخلي هدف وتسعى اله ..

يوميًا أنت عندك 24 ساعة .. وين يروح هذا الوقت؟

هل جاي تتجه نحو أهدافك والأشياء اللي تريد تحققها، لو لا؟

كل غاية، مشروع، هدف تريد تحققه، ينبني على تنظيم الوقت ..
بدون تنظيم الوقت مراح تكدر تحافظ على نفسك، واهدافك ع مدى بعيد ..

الدكتور طارق السويدان عنده دورة ع اليوتيوب جدًا مفيدة بهذا الموضوع:

من العادات المفيدة أيضًا هي عادة القراءة .. جرّب تبدي تقرأ، أقرأ اشياء حتى تتعلمها (مو روايات، ولا شعر).

أيضًا، تعلّم تحافظ على صحتك (أكل صحي، رياضة) ..

مجتمعنا ما عنده أيّ ثقافة بخصوص المحافظة على الصحة، والأكل الصحي ..

عادات بسيطة ممكن هواي تحسّن من صحتك ..

أيضًا، ابني عادة صحية مع موبايلك، لا تبقى تستخدمه طول الوقت ..

جرّب تستخدمه لأقل وقت ممكن ..

هذه كلها عادات، أنت تبنيها، ومراح تشوف الفرق اليوم، ولا باجر، راح تشوفه بعد فترة من تطبيق العادات ..

بعد فترة من الإلتزام بالرياضة، يلا تبدا تشوف تغييرات بجسمك ..

بعد فترة من الإلتزام بالقراءة، راح تشوف مفاهيم جديدة أنفتحت أمامك ..

 

أستفيد من وقت الكلية بشكل خاص بتوسيع مداركك حول الحياة، يعني صير منفتح، وحاول تتعلم دائماً ..

مجتمع الكلية مفيد، ويعلم، لكونه منفتح أكثر من غيره

وحتى وأحنا بزمن الكورونا، فالدوام الجزئي، انطاك وقت كبير جدًا تتعلم بيه، حرامات تضيّعة.